Jabekuntza elebiduna eta kode-bereizketa: subjektu eta objektu markak

Laburpena

Ikerketa honen bidez euskaraz eta gaztelaniaz aldi berean jabetu den haur elebidun baten aho ekoizpenaren azterketa burutu dute egileek. Arakaturiko aldia haurraren 1;07 adinetik 3;00 adinera luzatu da. Arakaturiko arloa bi hizkuntzetan subjektuen eta objektuen markakera izan da, kontuan izanik euskaraz aditz iragankorren subjektuak (-k marka) aditz iragangaitzen subjektuetatik (-Ø) bereizten direla eta gaztelaniaz, ostera, subjektuak ez direla morfologikoki bereizten. Ikerketaren helburua bi hizkuntza aldi berean ikasten duten haur elebidunek morfologia-ezaugarriak eta egitura sintaktikoak erabiltzen hasten direnean gramatika sistema biak bereizita garatzen dituztela erakustea da. Horretarako, haur elebidunaren datuez gain, adin bereko euskal zein gaztelaniadun elebakarren datuak ere erabili dira.