Jenero kontzeptuaren inguruko hausnarketak

Laburpena

Azken hamar urte hauetan, jenero hitza gero eta erabiliagoa izan da literatura soziologikoan. Hasieran, soziologian eta askoz lehenago beste jakintza-arlo batzuetan, esaterako antropologian, jeneroa ‘emakume’ kategoria ordezkatzera zetorren aldaketa teoriko handirik sortu gabe. Lehen, Emakumeen Ikerketak (Women’s studies) izendapenarekin ezagutzen genuen sexu-ezberdintasun soziala-z arduratzen zen arlo teorikoa; egun jenero edota Jenero Soziologia-z ari gara gauza bera adierazteko, nahiz eta aurreko izendapena erabat bazterturik ez geratu. Baina hori bai, desberdintasunari buruzko arlo teoriko hau soziologian nagusi izan diren esparru teorikoetatik ondo bereiztua eta aldendua dago, jenero eta lan-banaketa sexuala bezalako kontzeptuek gizarte-egituraren arloarekin zerikusirik ez balute bezala.