Sozialdemokraziaren eraberritzearen bideez

Laburpena

Azkeneko hamarkadetan sozialdemokrazian izandako eraldaketan ezinbestekoa da Hirugarren Bideek suposatu zuten astindua kontuan hartzea. Ikuspuntu ideologiko guztiek globalizazioarekiko aldaketak egin behar izan dituzte eta sozialdemokraziak bere Estatu idealaren egituran egindako doitzeak diskurtso neoliberalaren hegemoniaren emaitza dira. Horren ezaugarririk behinena ongizateak lehiakortasun ekonomikoaren aurrean lehentasuna galtzea da, sozialdemokraziaren tresna erabakigarriak martxan jartzea gero eta zailago bilakatuz. Hirugarren Bideen eta beste ikuspuntu progresisten planteamenduak erantzun teorizatuak dira egoera honen aurrean.