Zôon aktiboa eta pasiboa: gizaberea aska gozoan

Laburpena

Indibidualismoak prentsa txarra dauka ia korronte soziologiko eta ideologiko guztietan. Hala eta guztiz ere, indibidualismoa eta indibiduazioa bereiztearen aldekoa naiz; lehenak, kapitalismoarekin dauka lotura eta, bigarrenak, modernizazioarekin. Kapitalismoa eta modernizazioa bereiztea gure gizarteko hainbat fenomeno azaltzeko emankorra izan daiteke. Hori da artikuluan egiten dena. Ulrick Beck-ek dioen moduan, gizarte arriskutsu batean bizi gara, baina ez bakarrik faktore teknologikoengatik, arrisku sozialak ere gero eta garrantzi handiagokoak direlako. Gizarte-arrisku horiek gaur egungo gizarteetako desinstituzionalizazioari lotuta daude, eta etorkizuneko gizarteek, baita proiektu sozio-politikoek ere, gizaki indibiduala kontuan hartu beharko dute.