DBHko ikasleen iritzi-testuetako gaitasun diskurtsiboak langai

Laburpena

Egungo irakaskuntza-sistemak, elebidun orekatuak bermatzeko, ikasleen komunikazio-gaitasuna erdietsi behar du. Helburua asebetetzeko, material didaktikoa helburu horretara egokitzeaz gain, ikasgelako egiteko moduetan aldaketak behar dira. Horrek irakasleari bi erronka, bederen, planteatzen dizkio: batetik, ikasleen zailtasun diskurtsiboak identifikatzea, eta bestetik, i(ra)kas-prozesua zailtasun horiek gainditzera bideratzea.

Artikulu honetan, argudio-testua langai izan duen sekuentzia didaktiko baten emaitzak aurkezten dira; zehazki, Genevako Unibertsitateko Hizkuntzen Didaktikako taldeak eraikitako sekuentzia didaktikoaren metodologia erabiliz.

Argudioaren alderdi irakasgarriak identifikatzeko, Lekaroz-Elizondo ikastetxeko DBHko 4. mailan jasotako iritzi-testuak aztertu dira; lehenbizi, argudio-testuen berezko ezaugarri diskurtsiboak bildu dira, eta ondoren, ikasleen aurretestuetako oztopo nagusiak identifikatu, irakas-objektuak zedarritu eta, horiek gelaratzeko moduluen zer-nolakoak zehaztearekin batera, ondo-testuen izenburuetan eta sarreretan azaleratu diren garapen-aztarnak aurkeztu dira.