Europako Itun konstituzionalak eskubide gabe utzi ditu hizkuntza-komunitate ugari

Laburpena

Artikulu honetan Europar Batasunak Erromako Itunetik hizkuntza gutxituekiko izan duen jarrera azaldu nahi izan da. Horrela, Europako Itun Konstituzionalean hizkuntzei zein hizkuntza-eskubideei eskaini zaien lekua ere aztertu da. Itunaren hiru ataletan hizkuntzen inguruan agertzen diren artikuluen azterketa eta balorazioa agertu nahi izan da, bai eta horrek hizkuntza ofiziala ez den hizkuntzetako hiztunengan duen eragina ere.
Maastricht, Niza, Amsterdam... guztiek eredu berari jarraitu izan diote. Are gehiago, duintasunean, askatasunean, berdintasunean, elkartasunean, herritartasunean eta justizian oinarritutako Batasunaren oinarrizko eskubideen gutunak ere ikusgabe bihurtzen gaitu. Hartara artikulu honetan Europar Batasunak estatu-hizkuntzak ez diren besteekiko duen axola-gabekeria erakutsi besterik ez dugu nahi izan, eskubide gabe utzi baikaitu, gu eta gu bezalakoak.