Aditzaren aspektuaz edo gaztelaniazko orainaldi historikoaren baliagarritasuna euskaraz

Laburpena

Historiako artikuluak euskaraz idatzi ohi ditugunean, edo historiaz euskaraz idazten dugunean, gaztelaniaren eraginez, maiz, orainaldiko aditz-formak erabiltzen ditugu —gaztelania lehen edo bigarren hizkuntza gisa daukagun historialariek, jakina—. Historiako idazlan produkzioan gaztelaniaz orainaldi historikoa erabiltzea da horren arrazoia. Lan honen helburua honako hau aztertzea da: iraganean gertatutako gauzak idatziz kontatzeko euskaraz zein aditz-forma erabili diren, eta, beraz, historiaz aritzean zeintzuk diren historialariek erabili beharko genituzkeenak.