Zaporearekiko abertsioa arratoietan: adiskide pozoituaren efektuan hainbat aldagai kognitibo eta sozialen eragina

Laburpena

Pertsonek zein animaliek elikaduraren aurrean duten portaera ikerketa-objektu garrantzitsu bihurtu da ikaskuntza psikologiaren eremuan. Izan ere, elikagai egokiak hautatzea eta kaltegarriak saihestea funtsezkoa da bizirik irauteko. Lan honetan, zaporearekiko abertsio baldintzatua eta, zehazkiago, Adiskide Pozoituaren Efektua (APE) deritzon fenomenoa aztertzen da arratoietan. Fenomeno horri garrantzi berezia emanez, animaliek dieta kaltegarriak saihesteko erabiltzen dituzten estrategiei buruz azken hamarkadetan egin diren ikerketak azalduz hasiko gara. Jarraian, APE-an eragiten duten aldagai kognitibo eta sozial nagusiak aztertuko ditugu. Artikuluaren azken zatian, fenomeno hori azaltzeko proposatu diren mekanismo garrantzitsuenen berrikuspena egingo dugu.