Europar Batasunean merkaturatutako SARS-CoV-2 birusaren aurkako txertoen onura/arrisku orekaren ebaluazioa

Laburpena

SARS-CoV-2ak eragindako pandemiak osasunean eragina izan du batez ere adineko helduen eta lehendik osasun-arazoak dituztenen artean. Premiaz garatu behar izan dira txerto profilaktikoak COVID-19 deritzon gaixotasunari eusteko. Hori dela eta, COVID-19aren aurkako txertoak aurrekaririk gabeko abiaduran garatu dira. Txerto horien eraginkortasuna eta segurtasuna ahalik eta lasterren ebaluatzea eta konparatzea ezinbesteko bihurtu da, eta hori izan da lan honen helburua. Horretarako, bilaketa bibliografikoa egin da Pubmed, Google Scholar, Europako Medikamentuen Agentziaren (EMA) eta Medikamentuen eta Osasun Produktuen Espainiako Agentziaren (AEMPS) txostenak bezalako iturri eta datu-baseetan 2021eko abendura arte. EMAk onartutako txerto guztien (Comirnaty Bio NTech-Pzifer, COVID-19 Vaccine Moderna, Vaxzevria edo AstraZeneca, eta COVID-19 Vaccine Janssen, alegia) entsegu pibotalak aztertu dira, hau da, agentzia erregulatzaileek erabili dituztenak baimena emateko eta datu teknikoen fitxaren oinarri direnak.